کتاب اور صاحبِ کتاب کی نذر
لعل و گوہر سے گِراں تر اُن کی یہ تحریر ہے
ہے یہی تخت شہی ، اُن کی یہی جاگیر ہے
علم سے بڑھ کر کوئی بھی نعمتِ کبریٰ نہیں
علم طاقت، علم دولت، علم ہی شمشیر ہے
اِس میں غوطہ زن تمہیں ہونا ہے میرے دوستو
وقت کا جو خواب ہے اُس کی یہی تعبیر ہے
اختصار و جامعیت کی مرقعّ ہے یہی
بند کوزے میں سمندر ، ان کی ہر تقریر ہے
کس قدر گہری نظر ہے اِن کی سب حالات پر
وقت کے نباض کی منہ بولتی تصویر ہے
چار گوشہ اُن کی شخصیت ہے خود ہی دیکھ لو
اِک مدرس، ایک عالم ہے ،خطیب اور پیر ہے
ظلمتِ شب میں فروزاں نور کا مینار ہیں
سَیف ہے اُن کی زباں ، ہر لفظ میں تاثیر ہے
اک خزینۂ گراں مایہ ہے اُن کی پیشکش
ہر مدرس ، ہر مقرر کے لیے اکسیر ہے
حضرت راشد ؔ کی کاوش مرحبا ، صد مرحبا
اِن کا اِک اِک حرف تائبؔ نعرۂ تکبیر ہے
پروفیسر اکرام تائب
سابق صدر شعبہ (اردو ادبیات)
گورنمنٹ پوسٹ گریجوایٹ کالج عارف والا