سیدابوالاعلیٰ مودودیؒ ۲۵ ستمبر ۱۹۰۳ء کوحیدرآباد کے شہر اورنگ آباد ( محلی چپلی پورہ) میں پیداہوئے۔ آباؤاجداد کاوطن دہلی تھا ۔لیکن والد حیدرآباد دکن چلے آئے۔[[1]] آپ کاشجرہ نسب سلسلہ چشتیہ سے ملتا ہے۔ آپؒ ننھیال کی طرف سے ترکی الاصل ہیں ۔ددھیال کی طرف سے خواجہ قطب الدین مودودی چشتی کے نام سے منسوب ہوکر مودودی کہلائے ۔اس سلسلے سے ان کانام امام حسین ؓ تک جاپہنچتا ہے ۔آپؒ کی والدہ ماجدہ خواجہ ابومحمدچشتی کی ہمشیرہ اورخواجہ ابواحمد ابدال چشتیؒ کی دختر نیک اختر تھیں ۔[[2]]

مولانا مودودیؒ کے آباؤ اجداد نے نویں صدی میں ہجرت کی اورہندوستان آئے۔ پہلے پہل کرنال کے قریب قصبہ براس میں مقیم ہوئے ،یہ زمانہ سکندر لودھی کاتھا۔وہاں سے مغل بادشاہ شاہ عالم کے زمانے میں دہلی چلے گئے ۔ ان کےخاندان نے خاندان مغلوں کی خدمت کی اورخاص طورپر آخری مغل تاجدار بہادر شاہ ظفر کے دربارمیں بھی رسائی حاصل کی ۔ جنگ آزادی ۱۸۵۷ء کے نتیجہ کے طورپر سلطنت مغلیہ کے زوال کے ساتھ ہی مودودی کے خاندان کی حیثیت کوبھی شدید نقصان پہنچا۔[[3]]

مولانا مودودیؒ کے والدسید احمدحسن تھے جوپیشہ کے اعتبارسے وکیل تھے۔ چونکہ مذہبی گھرانے سے تعلق تھا اس لئے انھوں نے وکالت کاپیشہ ترک کردیا کہ یہ ان کے خیال میں جائز پیشہ نہ تھا ۔مولانا مودودی تیرہ برس کے تھے تووالد پرفالج کاحملہ ہوا اوروہ ۴سال بعد ۱۹۲۰ء میں وفات پاگئے ۔[[4]]