۱۹۱۸ ء میں وہ بجنور میں اپنے بڑے بھائی ابو الخیر کے پاس چلے گئے۔جہاں انہوں نے صحافت کو بطورپیشہ اپنا لیا۔۱۹۱۹ ء میں جبل پور چلے گئے جہاں انہوں نےکانگرس کے پرچہ ہفت روزہ تاج میں کام شروع کردیا اور ۱۹۲۰ ء تک مدیر کے فرائض انجام دیے۔[[1]]

مولانا کچھ عرصہ تحریک ہجرت میں بھی کام کرتے رہے۔ یہ ۱۹۲۱ ء کا زمانہ تھا کہ مولانا مودودی کا تعارف جمعیت العلمائے ہند کے قائدین مولانا مفتی کفایت اللہ اور مولانا احمد سعید سے ہوگیا۔ وہ مولانا کی صلاحیتوں سے بے حد متاثر ہوئے ۔اور انھیں جمیعت کے اخبار "مسلم" کی ادارت کی ذمہ داریاں سونپ دیں جو انہوں نے ۱۹۲۴ ء تک نبھائیں ۔[[2]]بعد ازاں جب مسلم الجمیعۃ بن گیا تو اس میں مولانا ادار ت کے فرائض انجام دیتے رہے ۔مولانا نے ۱۹۲۵ میں الجمیعۃ کے اداریوں میں "اسلامی قوت کا اصلی سر چشمہ " کے عنوان سے مسلسل مضامین شائع کیے جنھیں شبیر نیاری نے مرتب کیا ۔ ان مضامین کو کتابی شکل میں شائع کیا جس کا نام " اسلام کا سر چشمہ قوت"ہے ۔اس کتاب کے شائع ہونے سے پہلے "الجہاد فی الاسلام " کو ہی مولانا کی پہلی تصنیف خیا ل کیا جاتا ہے ۔[[3]]