شبِ تیرہ کی سیاہی کے چند خاموش،

بے رنگ، دودھیا لمحوں میں

خوابیدہ رہے ہم تم

یہاں آؤ

گھڑی بھر کو

تم اپنی سرخ ہتھیلی کو کھڑکی پر ٹکا کے

دھند کے اس پار،

افق سے بھی پرے دیکھو

سنو!

سرگوشیاں چلتی ہواؤں کی

یہ موسم، جان و دل کے زخم بوسیدہ، پرانے سب،

ہرے کرنے کا موسم ہے

وہ دیکھو!

دور اوپر آسماں کی وسعتوں میں

سرمئی گہرائیاں ہم کو بلاتی ہیں

چلو آؤ!

کہ ہم بانہوں میں بانہیں ڈال کر

آغاز کرتے ہیں، نئی اک بےکراں

نیلی، بنفشی سی مسافت کا

کہ ہر حد سے پرے

ہم نور کی پرواز کرتے ہیں