نعت

تجمل حسین تجمل قادری

وادیءِ سرورِ ﷺلَولاک میں گُم ہو جاؤں
مَیں مدینے کی حسِیں خاک میں گُم ہو جاؤں
کاش سرکار ﷺکے نعلَین کا ذرّہ ہوکر
مُسکراتے ہوئے اَفلاک میں گُم ہو جاؤں
اے خدا اِتنا بڑھا دے تُو مِرا رزقِ سُخَن
راحتِ قَلب کی خوراک میں گُم ہو جاؤں
حرف مِدحَت کے اُترتے ہیں مِرے سِینے میں
جب کبھی دیدہءِ نَمناک میں گُم ہو جاؤں
آج ہوجائے عطا مقطعِ انوار کوئی
آج پھر مطلعِ اِدراک میں گُم ہو جاؤں
اِس قدر تُونے تراشے ہیں خدوخالِ حیات
دِل یہ کرتا ہے تِرے چاک میں گُم ہو جاؤں
جب تلک وَصل کی راحت نہ میسّر آئے
کیوں نہ پھر ہِجر کی پوشاک میں گُم ہو جاؤں
اَب تو بَس ایک ہی خواہش ہے تجّمُل میری
مدحتِ پَنجتنِ پاک میں گُم ہو جاؤں