غزل ۔۔۔ڈاکٹر انوار علی انوار

شومئ قسمت ہے یا اک کھیل ہے تقدیر کا
رنگ اب مجھ سے نہیں ملتا میری تصویر کا
غرق ہوتا ہی رہا، برباد ہوتا ہی رہا
خواب جس نے بھی یہاں دیکھا کوئی تعمیر کا
مجھ سے بڑھ کر اس کو میری شاعری اچھی لگی
یہ کرشمہ دیکھ لے کوئی میری تحریر کا
اس نے جاکر اور ہی دنیا نئی آباد کی
مستقبل حصہ رہا ہے جو میری جاگیر کا
جس نے ذہنوں کو غلامی میں کیا تھا پختہ تر
منتشر میں نے کیا وہ سلسلہ زنجیر کا
ہائے دو راہے پہ میں آکے کھڑا ہی رہ گیا
خواب سے باغی تھا ہر اک راستہ تعبیر کا
میں نے انور راہ پر ڈالا نہیں اس شوخ کو
ہر گناہ اس کا تسلسل ہے میری تقصیر کا