آؤ خود کو ڈھونڈتے ہیں،،

جانے کب سے کھو چکا ہوں شہر میں

جانے کب سے اپنا چہرہ ڈھونڈتا پھرتا ہوں میں

شہر کے ان راستوں میں

کس قدر تنہائی ہے

ہر کوئی تنہائیوں کی

بھیڑ میں کھویا ہوا ہے

یوں تو سورج کا اجالا ضوفشاں ہے

پھر بھی گلیوں میں ابھی تک

تیرگی سی ہے رواں

ایسے عالم میں بھلا ہم

کیسے ڈھونڈیں خود کو اپنے شہر میں

شہر اپنا ہےمگر ہم

ڈھونڈتے پھرتے ہیں خود کو

جانے کب دیکھیں گے ہم اک آشنا چہرہ کوئی

گر یہاں کوئی ہمارا آشنا چہرہ نہیں تو

آؤ خود کو ڈھونڈ لیں

آؤ خود کو دیکھ لیں

شہر کی اس بھیڑ میں