غزل ۔۔۔ڈاکٹر محمد کامران

پروفیسر پنجاب یونیورسٹی لاہور

ایسا بھی نہیں تم سے مجھے پیار نہیں ہے

لیکن مجھے اس بات پہ اصرار نہیں ہے

میں نے یہ غزل موجٍ صبا تجھ پہ کہی ہے

حالانکہ مجھے تجھ سے سروکار نہیں ہے

اس شخص کی آنکھیں مجھے سونے نہیں دیتیں

دل جس کی محبت میں گرفتار نہیں ہے

میں نے بھلے وقتوں میں خریدا تھا کوئ خواب

اب اس کا کہیں کوئ خریدار نہیں ہے

ماں باپ کی عزت کا اسے خوف ہے ورنہ

اس شوخ کے انکار میں انکار نہیں ہے