کیا کوئی ضابطہ ایسا کسی آئین میں ہے        :                کہ وہ مجرم ہے جو تہذیب کی تزئین میں ہے

میرے اس عہد میں رسوا جسے ٹھہرایا گیا :                اُس کی عظمت کا بیاں سورۃٔ والتّین میں ہے[۱]

پوچھ سکتا ہوں میں اے صاحبِ دستار و عمل :           کیوں کمر بستہ تو اقدار کی توہین میں ہے

جو بھی لب وا ہو مرے عہد میں وہ لب سی دو              :               یہ بھی اک حکم مرے شاہ کے فرامین میں ہے

اژدرِ کذب نے سچائی کو کھا ڈالا ہے       :               کوئی وقعت کہاں اب تیرے براہین میں ہے

تیری قسمت پہ تڑپ اٹھتا ہوں اے خاکِ وطن :       جو مرے عہد کے اب دستِ سلاطین میں ہے

تو نے کیا خود کو سرائیل سمجھ رکھا ہے       :               کیوں ترا دخل مرے دل کے فلسطین میں ہے

جس قدر آج یہاں اونچی ہوا میں اُڑ لیں : آخری فیصلہ دیوانِ علیّین میں ہے

وقت کو جو لیے پھرتا تھا کبھی مٹھی میں

اب وہ شاکر نہ ہی تیرہ میں ہے نے تین میں ہے