لمس کی پوروں پہ تھی جو حکمرانی بیچ دی،

آج اس کی آخری ہم نے نشانی بیچ دی۔

ہم نے قصداً اپنے غم سے بے خبر رکھا تمہیں،

جو تمہارے تک پہنچتی وہ کہانی بیچ دی۔

لے کے جاتی تھی ہمیں اجداد کی قبروں پہ جو،

ہم نے گاؤں کی وہ پگڈنڈی پرانی بیچ دی۔

اب تم آؤ گے تو ہر جذبہ ملے گا منجمد،

ہم نے دریائے محبت کی روانی بیچ دی۔

کون ہوتا زیر بارِ کاغذ و دست و قلم،

واردات-قلب و جاں ہم نے زبانی بیچ دی۔

کر گئ خوشبو بھی آخر سارے رشتے کالعدم،

ہم نے جب وہ موتیا، وہ رات رانی بیچ دی۔

اب کہاں مہمان بن کے ہم رہیں طاہر وحید،

اہل دل نے اپنے دل کی راجدھانی بیچ دی