بے رنگ ریگ زار میں جینا پڑا ھمیں

دشمن کے اختیار میں جینا پڑا ھمیں

تاریکیوں میں ایک کرن بھی نہ مل سکی

لگتا ھے جیسے غار میں جینا پڑا ھمیں

جیون کی الجھنوں کونہ سلجھا سکے کبھی

اک عمر خلفشار میں جینا پڑا ھمیں

جب یہ کھلا فریب ھے یہ ساری کائنات

مرنے کے انتظار میں جینا پڑا ھمیں

اس کے لئے شکست بھی ھم نے قبول کی

اک روز اپنی ھار میں جینا پڑا ھمیں

اڑتی رھی ھے دھول دلوں سے نگاہ تک

تنہا اسی غبار میں جینا پڑا ھمیں

ھم نے سلگ سلگ کے گذاری ھے زندگی

اک آگ کے حصار میں جینا پڑا ھمیں

اک پل جہاں ٹھہرنا گوارا نہ تھا نوید

برسوں اسی دیار میں جینا پڑا ھمیں