رسول اللہﷺ جب مکہ مکرمہ سے ہجرت کرکے مدینہ منورہ تشریف لائے تو مدینہ میں ایک اسلامی ریاست کی بنیاد رکھی جسے پہلی اسلامی ریاست کا درجہ حاصل ہے ،پھر ریاست مدینہ میں مہاجرین اور انصار کو مواخات کے رشتے میں پرو دیا اور یہود کے ساتھ معاہدہ کر لیا۔ میثاق مدینہ کی رو سے رسول اللہ ﷺ مدینہ منورہ کے مُنصف قرار پائے ۔ آپ ﷺنے صحابہ کرام رضوا ن اللہ اجمعین کی اس نہج پر تربیت فرمائی کہ آپ ﷺکی وفات کے بعد انہوں نے معاشرے میں اطاعت الہی اور اتباعِ رسول ﷺ کو عام کیا اور ا سی کے مطابق زندگی بسر کی ۔ اسلام کا ابتدائی دور چاہے دور نبویﷺ ہو یا خلفائے راشدین کا دور ، یہ اللہ پاک کی رحمتوں و برکات سے بھرپورتھا۔ اس دور کو تمام مسلمان قیامت تک کے لیے مشعل راہ اور نمونہ سمجھتے ہیں۔