مولانا شکر اﷲ مبارک پوری
۲۴/مارچ کوایک ٹیلی گرام کے ذریعہ معلوم کرکے بڑا افسوس ہواکہ جمعیۃ علماء صوبۂ آگرہ کے صدر مولانا شکر اﷲ صاحب مبارک پوری طویل علالت کے بعد ۲۳/مارچ کو عالم فانی کی طرف رحلت فرماگئے۔ مولانا موصوف نہایت مخلص، عالم باعمل اور پُرجوش قومی کارکن تھے۔ردِّبدعات میں ہمیشہ پیش پیش رہتے تھے۔اپنی معاش کے لیے کپڑے کا کاروبار کرتے تھے۔اس لیے قومی کاموں میں بے دریغ اپنی جیب سے خرچ کرتے تھے۔ان کے مشاغل علمی اور عملی دونوں قسم کے تھے۔پرانی تعلیم کے بزرگ ہونے کے باوصف سیاسی سمجھ بوجھ اورمعاملہ فہمی میں وہ اپنے کسی ہم عصر سے کم نہ تھے۔ اﷲ تعالیٰ آں مرحوم کو جنت الفردوس میں جگہ عطافرمائے اورپسماندگان کوصبرِ جمیل کی توفیق ارزاں ہوکہ سدارہے نام اﷲ کا! [اپریل۱۹۴۲ء]