مولوی قاضی ظہور الحق
اس سلسلہ میں ہمیں اپنے مخلص اورجواں مرگ دوست مولوی قاضی ظہور الحق صاحب کی یاد بھی آرہی ہے۔مرحوم نجیب آباد کے ایک قصبہ جلال آباد کے رئیس اعظم اوردارالعلوم دیوبند کے فارغ التحصیل تھے، خوب رواورخوش خو تھے۔ ندوۃ المصنفین سے دلی عقیدت وارادت رکھتے تھے۔رئیس ہونے کے باوجود احکام مذہبی کے سخت پابند گویا صحیح معنٰی میں جوان صالح تھے۔امور خیروصلاح میں ہمیشہ سابقون اولون کی صف میں رہتے تھے۔پورے خاندان کے واحدمربی اور سرپرست تھے۔تندرستی لائق رشک تھی، مگر چند ماہ سے پھیپھڑوں میں پانی اتر آیا تھا،اس کا آپریشن کرایا گیا جو آخرکار گزشتہ ماہ قید ہستی سے ہی نجات کاسبب بنا۔ عمر۳۴۔۳۵سال کے لگ بھگ تھی۔حق تعالیٰ مرحوم کواپنی رحمت ومغفرت کے دامن میں جگہ عطافرمائے۔آمین۔ [اپریل ۱۹۴۲ء]