نہالؔ سیوہاروی
جناب نہال ؔ سیوہاروی کی شہرت کاآغاز ’’برہان کے شاعر خاص‘‘ کی حیثیت سے ہوا جس میں تقسیم ہند سے قبل وہ بالا لتزام غزلیں اورنظمیں لکھتے رہے۔ مرحوم کاذوقِ شعر وسخن اور ملکۂ شعر گوئی فطری اوروہبی تھاجس کوانھوں نے خلاف طبع معمولی سی سرکاری ملازمت کے باوجود مسلسل مطالعہ اور مشق و مزاولت کے ذریعہ جلا دے کراتنا اجاگرکرلیا تھاکہ ان کاشمار پختہ کار اورصاحب فن اساتذہ کے زمرہ میں ہونے لگاتھا۔ ان کے کلام میں دردواثر، سوزو گداز، عمقِ خیال،نزاکتِ احساس اورلطافت وشستگیِ بیان، جوحسنِ شعر کی جان ہیں یہ سب اوصاف پائے جاتے تھے۔ علاوہ سینکڑوں منتشر غزلوں اورنظموں کے آزادی پران کی رباعیات کاایک مجموعہ مکتبۂ برہان سے اور نظموں اورغزلوں کا ایک مجموعہ ’’شباب و انقلاب‘‘ کے نام سے دلی کے ہی کسی ایک مکتبہ کی طرف سے شائع ہوچکے ہیں۔
؂ حق مغفرت کرے عجب آزاد مرد تھا
[جنوری ۱۹۵۲ء]