حافظ ضیاء الدین احمد
افسوس ہے پچھلے مہینہ حافظ ضیاء الدین احمد صاحب ایڈیٹر ندائے حرم کرانچی کاانتقال ہوگیا۔ مرحوم مدرسہ صولتیہ مکہ معظمہ کے صدر دفتر کے انچارج تھے۔ قرول باغ دہلی میں ان کا دفتر دفترِبرہان کے پڑوس میں تھا۔۱۹۴۷ء کے ہنگاموں میں ہم سے قرول باغ چھٹا تومرحوم اس ملک کو ہی خیرباد کہہ کر کراچی میں جابیٹھے۔ وہ اگرچہ ضابطہ کے عالم نہیں تھے لیکن بڑی اچھی سمجھ بوجھ اوراعلیٰ درجہ کی انتظامی قابلیت رکھتے تھے۔مہمان نوازی، تواضع اورفراغ حوصلگی و سیرچشمی ان کی طبیعت تھی۔ قرآن مجید کے صرف حافظ ہی نہیں تھے بلکہ اس کے عاشق بھی تھے۔ روزانہ خودپابندی کے ساتھ اس کاورد کرتے تھے اوراپنی اولاد کو بھی تلاوت قرآن کی تاکید کرتے رہتے تھے۔ اﷲ تعالیٰ آں مرحوم کوابراروصلحاء کامقام عطافرمائے اورمدرسہ صولتیہ کی اس شاخ کومرحوم جیسے منتظم کے اٹھ جانے کے باعث کسی قسم کاچشم زخم پہنچنے سے محفوظ رکھے۔آمین [مئی۱۹۵۲ء]