مولانا مفتی حافظ عبداللطیف سہارنپوری
افسوس ہے پچھلے دنوں مولانا مفتی حافظ عبداللطیف ناظم مدرسہ مظاہر العلوم سہارنپور نے چند ماہ کی علالت کے بعد وفات پائی۔جناب مفتی صاحب صاحبِ علم تھے اورصاحب ِباطن بھی۔ فقہ کی جزئیات پربڑی گہری اوروسیع نظر رکھتے تھے۔اخلاق وعادات اورمکارم وشمائل ذاتی کے اعتبار سے سلف صالحین کانمونہ تھے۔ ان کے حسن قابلیت وانتظام کاثبوت اس سے زیادہ اورکیا ہوسکتاہے کہ گزشتہ چند برسوں میں وہ تیز وتند آندھیوں میں بھی مدرسہ کاچراغ جلائے بیٹھے رہے اور اس کوبہرطورقائم وزندہ رکھا،مدرسہ کے ساتھ آں مرحوم کو محبت نہیں، عشق تھا چنانچہ اسی کی خاطر انھوں نے پیرانہ سالی اورضعف ونقاہت کے باوجود پچھلے دنوں برما کاطویل و صبرآزما سفرکیا اوراگرچہ وہاں سے کامیاب وبامراد واپس ہوئے لیکن اپنے ساتھ ایک عارضہ لگالائے اورآخراسی عارضہ میں جان جاں آفریں کوسپردکرکے راہی ملک بقاہوگئے۔رحمہ اﷲ رحمۃ واسعتہً۔
[ستمبر۱۹۵۴ء]