پنڈت کشن پرشاد کول
پنڈت کشن پرشادکول لکھنؤ کے رہنے والے اور لکھنؤ کی پُرانی تہذیب اور روایات کی بڑی حسین یادگار تھے، اُردو زبان کے نکتہ سنج ونکتہ شناس، بلند پایہ ادیب اور بڑے صحیح الخیال اورنیک دل بزرگ تھے۔اُردو زبان اوراس کے ساتھ وابستہ کلچر اورتہذیب کے ساتھ اُن کوعشق تھا۔ یوپی میں اُردو کو علاقائی زبان بنانے کے لیے دستخطی مہم کی کامیابی زیادہ ترانھیں کی کوششوں کانتیجہ تھی۔اُردو سے متعلق ہرتحریک میں وہ سرگرمی سے حصّہ لیتے تھے۔ چنانچہ وفات سے کچھ دن پہلے ہی انھوں نے بہار میں اردو کانفرنس کی صدارت کی تھی اوراس میں بڑا اچھا خطبہ پڑھا تھا۔ اگرچہ وہ اب خود دنیا میں نہیں ہیں لیکن اپنے کردار وعمل اوراپنے اخلاق کاایک ایسا نقش چھوڑگئے ہیں کہ نئی نسلیں اُن سے بہت کچھ سبق حاصل کرسکتی ہیں۔ [ فروری ۱۹۵۵ء]