اقبال سہیلؔ
افسوس ہے کہ گزشتہ مہینہ اقبال سہیلؔ بھی چل بسے ۔وہ مسلم یونیورسٹی علی گڑھ کے باقیاتِ صالحات اور اُس عہد کی دیرینہ روایات کے حاملین میں سے تھے۔غیر معمولی ذہین وذکی تھے ۔فارسی اور اردو دونوں زبانوں کے بلند پایہ شاعر تھے۔ وہ اگر وکیل نہ ہوتے یامزاج لااُبالی نہ ہوتا توعلم وادب کے میدان میں ان کی شہ سواری کا مقابلہ بہت کم لوگ کرسکتے تھے ۔طبیعت حددرجہ دقیقہ رس اور دماغ بڑا نکتہ آفریں پایاتھا۔ نغز گوئی کے ساتھ اشعار میں روانی غضَب کی ہوتی تھی۔ غزلوں اور نظموں کے علاوہ انھوں نے جو نعتیہ نظمیں لکھی ہیں وہ بھی بڑے معرکہ کی ہیں، نثر بھی بہت اچھی لکھتے تھے ۔اگر کوئی صاحب اُن کے مضامین ِ نثر و نظم کو مرتب کرکے یک جا شائع کردیں تویہ اردو ادب کی مفید اورلائقِ قدر خدمت ہوگی۔ورنہ ان ادبی جواہر پاروں کے ضائع ہوجانے کا اندیشہ ہے ۔حق تعالیٰ مغفرت وبخشش کے فضل ِ خاص سے نوازے ۔ [دسمبر۱۹۵۵ء]