سید مرتضیٰ علی
افسوس ہے اس مہینہ میں ہمارے ایک نہایت عزیز اور مخلص دوست سید مرتضیٰ علی نے بھی دہلی میں وفات پائی۔ مرحوم نواب صدیق حسن خاں صاحب مرحوم کے نواسی داماد تھے۔حکومت ہند کے محکمہ دفاع میں اعلیٰ افسر تھے۔تقسیم کے بعد بھی یہیں رہے۔دلّی کی جامع مسجد کے قریب ان کا آبائی مکان تھااُسی میں رہتے تھے اورجامع مسجد میں نماز اس پابندی سے ادا کرتے تھے کہ وفات سے پہلے سخت مجبوری کے باوجود انھوں نے نمازباجماعت ترک نہیں کی۔ادارہ ندوۃ المصنفین کے شروع سے محسن اوراس کے کاموں کے بڑے قدردان تھے۔ اسلام کی محبت اورعشق میں سرشار رہتے تھے۔بڑے خلیق،متواضع،صاحب ِخیر، غیور و خوددار اور حد درجہ پابندِ وضع تھے۔اﷲ تعالیٰ ان کوغریق رحمت فرمائے اور پسماندگان کوصبر جمیل کی توفیق ارزاں ہو۔آمین [جولائی۱۹۵۶ء]