حاجی محمداسمعٰیل جیون بخش
افسوس ہے پچھلے دنوں دہلی کے مشہور صاحب خیر بزرگ حاجی محمداسمعٰیل صاحب جیون بخش نے عمر طبعی کو پہنچ کروفات پائی۔موصوف مشہور فرم جیون بخش کے سب سے بڑے حصّہ دار اور اس کے روح ورواں تھے۔ لیکن وہ جتنے متمول اور صاحبِ ثروت تھے اس سے کہیں زیادہ عابد وزاہد متقی اور پرہیز گار تھے۔ دینی اور خیراتی کاموں میں ہمیشہ پیش پیش رہتے تھے۔ نہایت خندہ جبیں اور صاحبِ باطن تھے۔ چہرہ پرنوربرستا تھا۔تونگری کے باوجود فقر ودرویشی ان کاشعار تھا۔ اب ایسے دین اوردنیا کے جامع کم ہی ہوں گے ۔حق تعالیٰ کروٹ کروٹ جنت نصیب کرے اور ابرار وصلحا کے ساتھ حشر فرمائے۔آمین ۔ [اپریل ۱۹۵۷ء]