رام بابو سکسینہ
افسوس ہے دسمبر کے آخری ہفتہ میں جناب رام بابو سکسینہ کاحرکت قلب بند ہوجانے سے بحالت سفر اچانک انتقال ہوگیا۔ موصوف کو اردو زبان وادب کے ساتھ عشق تھااوروہ اس کا بڑا وسیع اورگہرا مطالعہ رکھتے تھے۔یہی وجہ ہے کہ ایک ذمہ دار سرکاری عہدہ کی چند درچند مصروفیتوں کے باوجود انھوں نے ادبِ اردو پرمتعدد ضخیم کتابیں اپنی یادگار چھوڑی ہیں۔ ان کی کتاب ’تاریخ ادبِ اردو‘ کو بڑی مقبولیت حاصل ہوئی، اس موضوع پر یہ کتاب اس پایہ کی ہے کہ ادبِ اردو کاکوئی طالب علم اس سے بے نیاز نہیں ہوسکتا۔اس کے علاوہ’’اردو کے انگریز شعرا‘‘ نامی کتاب انھوں نے بڑی تلاش وجستجواورمحنت سے مرتب کی تھی۔ایک کتاب حال میں ہی’’مرقع شعراء‘‘کے نام سے شائع ہوئی ہے۔سنا ہے کہ دو کتابوں کے مسودے ابھی اورباقی ہیں جو غیر مطبوعہ ہیں،موصوف اب دنیا میں نہیں لیکن اُن کے یہ شاندار ادبی کارنامے اُن کانام زندہ رکھیں گے۔
[جنوری۱۹۵۸ء]