افضل العلماء ڈاکٹر عبدالحق
افسوس ہے افضل العلماء ڈاکٹر عبدالحق بھی پچھلے دنوں ستاون ۵۷ برس کی عمر میں راہی ملک بقا ہوگئے۔ شمالی ہند کے عوام میں توکم ہی لوگ ہوں گے جو مرحوم کوجانتے ہوں،البتہ جنوبی ہند میں ایک ایک بچّہ اُن سے واقف تھا اور مسلمان تواُن پرجان چھڑکتے تھے۔وہ جنوبی ہندکے ’’سرسید‘‘کہلاتے تھے۔ کیوں کہ انھوں نے مسلمان لڑکیوں اورلڑکوں کے سات اسکول اور کالج مدراس میں اپنی یاد گار چھوڑے ہیں۔علوم قدیمہ وجدیدہ دونوں کے مبصر عالم تھے۔پہلے کانپور کے ایک مدرسہ میں درس نظامی کی باقاعدہ تکمیل کی اوراس کے بعد انگریزی کے امتحانات کی طرف متوجہ ہوئے توآکسفرڈ یونیورسٹی سے ڈی فل کرکے ہی دم لیا۔ واپسی پرپہلے محمڈن کالج مدراس کے پروفیسر عربی اور پھر پرنسپل مقرر ہوئے، اس کے بعد مدراس کے گورنمنٹ پریسیڈنسی کالج کے پرنسپل ہوئے۔ یہاں سے پنشن لینے کے بعد مدراس کے پبلک سروس کمیشن کے ممبر اور آخر میں صدر بھی ہوگئے تھے ۔اﷲ تعالیٰ نے مرحوم کوعلمی اور عملی دونوں قسم کے کمالات سے نوازا تھا۔ علوم قدیمہ وجدیدہ کے نامور فاضل ہونے کے ساتھ صورۃً وسیرۃً نہایت راسخ العقیدہ مسلمان اورسچ مچ ایک مومن قانت تھے۔ نہایت جری اوردبنگ تھے، حق بات کے کہنے اورکرنے میں کسی کی ذرا پروا نہیں کرتے تھے۔برہان کے شروع سے خریدار اورندوۃ المصنفین کے بڑے قدردان تھے۔مسلم یونیورسٹی علی گڑھ کے کچھ دنوں پر و وائس چانسلر بھی رہے تھے۔انھیں دنوں میں کلکتہ یونیورسٹی کی ایک ضرورت سے کلکتہ تشریف لائے تو دیر ینہ تعلق کے پاس خاطر سے غریب خانہ کو بھی شرف قدوم سے نوازا۔ملاقات ہوئی اور شرف ہم طعامی بھی حاصل ہوا۔اس کے بعد مرحوم نے علی گڑھ میں مسلمان طلباء کے حقوق کے تحفظ کے سلسلہ میں جواقدامات کیے تھے وہ بڑے جوش وخروش کے ساتھ سنانے شروع کیے۔اتفاق ایسا ہوا کہ یہ روئداد سنتے سنتے بے ساختہ میری زبان سے نکلا کہ ’’توبس ڈاکٹر صاحب! آپ گئے، اب علی گڑھ میں نہیں رہ سکتے‘‘۔ مرحوم نے پوچھا ’’آخر کیسے؟ ’’میں نے عرض کیا ’’ میں نے جو کچھ کہا ہے اُس کومجذوب کی ایک بڑسمجھیے۔اورمجذوب کاحال یہ ہے کہ بات تو پتہ کی کہتا ہے۔ لیکن ’’کیوں ‘‘ اور’’کیسے‘‘ سے واسطہ نہیں رکھتا ۔چنانچہ ایساہی ہوا۔مرحوم علی گڑھ پہنچے اور وہاں سے غالباً ایک یا ڈیڑھ ماہ کے بعد ہی واپس ہوگئے۔مدراس پہنچ کر مرحوم نے مجھ کولکھا ’’میں آپ کے علمی اورادبی کمالات کاتو پہلے سے معترف تھا مگراب آپ کی ولایت کابھی قائل ہوگیا۔اَللّٰھُمَّ زِدْفَزِدْ‘‘مرحوم اس زمانہ میں ’’دین ودنیا بہم آمیزکہ اکسیر این است ‘‘کا سب سے بہتر نمونہ تھے۔ پورے ہند وپاک میں ان جیسے لوگ کم ہی ملیں گے ،حق تعالیٰ کروٹ کروٹ جنّت نصیب کرے اوراُن کی قبر ٹھنڈی رکھے۔آمین۔ [اپریل ۱۹۵۸ء]