سید عنایت حسین
افسوس ہے پچھلے دنوں دیوان سیّد عنایت حسین صاحب کاانتقال ہوگیا۔ مرحوم اجمیر میں درگاہ حضرت خواجہ غریب نواز رحمۃ اﷲ علیہ کے سجّادہ نشین تھے۔ اس نسبت سے اگرچہ وہ صوفی تھے اور جمعیۃ الصوفیاء ہند کے صدر بھی تھے لیکن آج کل کے عام سجادہ نشینوں کے برخلاف شریعت کے احکام و آداب اوراتباعِ سنّت کا حتی الوسع بڑا لحاظ اور خیال رکھتے تھے۔خود بھی بڑے اچھے عالم تھے اور علماء کااحترام کرتے اوران سے تعلقات رکھتے تھے۔ درگاہِ مذکور کاسجادہ نشین ایک چھوٹی موٹی ریاست کامطلق العنان والی ہوتا ہے ۔لیکن دیوان صاحب مرحوم فقیرانہ زندگی بسر کرتے تھے اورمسلمانوں کے قومی وملی معاملات سے بڑی دلچسپی لیتے تھے ۔اخلاقی اعتبارسے بڑے خوش مزاج ،شگفتہ طبع ،متواضع اور بڑے خلیق تھے۔ ان کادروازہ ہرحاجت مند کے لیے کھلا رہتا تھا۔گفتگو بھی بڑی شیریں اور موثر ہوتی تھی۔اﷲ تعالیٰ کروٹ کروٹ جنت نصیب کرے اورمدارج ومراتب بلند فرمائے۔آمین۔ [اکتوبر ۱۹۵۹ء]