مولانا حافظ احمد سعید دہلوی
قلم یہیں تک پہنچا تھا کہ اچانک مولانا حافظ احمد سعید صاحب دہلوی کی وفات حسرت آیات کی اطلاع ملی۔اناﷲ وانا الیہ راجعون۔مولانا جمعیۃ العلمائے ہند کے بانیوں میں سے تھے اوراس کے پہلے جنرل سیکرٹری تھے۔ اس حیثیت سے انھوں نے ملک میں دورے کیے اورجگہ جگہ تقریریں کیں،یہ زمانہ تحریک خلافت کے شباب کازمانہ تھا۔مولانا کی تقریروں نے دھوم مچا دی اوربچہ بچہ کی زبان پران کانام تھا۔دلّی کی ٹکسالی زبان بولتے اوراسی میں گھنٹوں خاص لب ولہجہ کے ساتھ تقریر کرتے تھے۔اس لیے اُن کی گفتگو اورتقریر دونوں اس قدر شیریں اورشگفتہ ہوتی تھیں کہ بس ’’وہ کہیں اورسُنا کرے کوئی‘‘۔ قرآن مجید کے بہت اچھے حافظ تھے اوراُس کے ساتھ بڑا شغف رکھتے تھے۔نہایت آسان زبان میں قرآن کاترجمہ وتفسیر لکھ رہے تھے جو غالباً پایۂ تکمیل کو پہنچ گئی ہے۔ دینیات پرمتعدد کتابیں بھی ان کی یادگار ہیں۔ متعدد بارحریت وطن کی راہ میں جیل گئے۔ طبعاً بے حد خلیق، ملنسار، خوش طبع اوربڑے بذلہ سنج بزرگ تھے۔ اگرچہ ادھر دوبرس سے جمعیتہ کے صدر تھے لیکن چند درچند عوارض واسقام کے باعث برسوں سے گوشہ نشین ہوگئے تھے۔دلی سے باہر کے لوگ اُن کی تقریر سننے کو ترستے تھے مگرانھوں نے سفر کرنا بالکل ترک کردیا تھا۔عجب باغ وبہار انسان تھے۔ان کا فقرہ فقرہ زبان کی لطافت ونفاست کامرقع ہوتا تھا۔دلّی وہ دلّی ہی نہیں رہی ہے۔ اب ایسے بزرگ کہاں ملیں گے؟کل من علیھا فان ویبقیٰ وجہ ربک ذوالجلال والاکرام۔ اﷲ تعالیٰ کروٹ کروٹ جنت نصیب اورصدیقین وشہدا کامقام جلیل عطافرمائے۔آمین [دسمبر۱۹۵۹ء]