مولانا مفتی عبداللطیف
افسوس ہے گزشتہ مہینہ مولانامفتی عبداللطیف صاحب کا علی گڑھ میں انتقال ہوگیا۔ مرحوم عوام میں مشہور نہ تھے لیکن ارباب علم کے طبقہ میں بڑی بلند شخصیت رکھتے تھے۔ استاذ العلماء مولانا لطف اﷲ صاحب کے ارشد تلامذہ میں سے تھے۔ علوم دینیہ میں بڑی پختہ استعداد اورایک خاص درک وبصیرت کے مالک تھے۔ سالہاسال جامعہ عثمانیہ حیدرآباد میں شعبۂ دینیات کے صدررہے، وہاں سے سبکدوش ہوکر علی گڑھ آگئے اوریہاں بھی یہی خدمت انجام دینے لگے، آخراس سے بھی سبکدوش ہوکر خانہ نشین ہوگئے۔ مگر مطالعہ اوردرس کامشغلہ آخر تک جاری رہا، چھوٹے بڑے چند رسالے اور دو ایک کتابیں بھی لکھی ہیں۔ اٹھاسی برس کی عمر میں وفات پائی مگر قویٰ خاص طورپر دماغ آخر وقت تک کام کرتے رہے۔باطنی احوال وکوائف سے بھی ناآشنا نہیں تھے۔اﷲ تعالیٰ مغفرت و رحمت کی بیش ازبیش نعمتوں سے سرفرازفرمائے۔آمین [جنوری۱۹۶۰ء]