حضرت دلؔ شاہ جہاں پوری
حضرت دلؔشاہ جہاں پوری بڑے پایہ کے قدیم اساتذۂ شعرو سخن میں سے تھے۔فنی اعتبار سے وہ مسلمہ طورپرجانشینِ امیر مینائی تھے۔نظام حیدرآباد نے بھی ازراہِ قدردانی اُن کو اعتبار الملک کاخطاب دیا تھا۔اُن کی شاعری کااصل میدان تغزل تھا، اگرچہ قدرت ہرصنف پررکھتے تھے۔’’نغمۂ دل‘‘اور’’ترانۂ دل‘‘ کے نام سے اُن کے دومجموعے شائع ہوکر عوام وخواص میں مقبول ہوچکے تھے۔ اُن کے تلامذہ کی تعداد جن میں اب بعض خود استاد ہیں سینکڑوں تک پہنچی ہوگی۔ شعروسخن کے علاوہ موصوف اونچے درجے کے طبیب اوردرس نظامی کے باقاعدہ فارغ التحصیل تھے۔اخلاقی اعتبار سے بھی بڑے بلند مرتبہ بزرگ تھے۔ نہایت بامروت وسیر چشم،متواضع،خوددار اورغیور۔ افسوس ہے پچھلے دنوں نوے برس کی عمر میں وفات پائی۔اب ایسے لوگ کہاں ملیں گے؟ اﷲ تعالیٰ مغفرت و رحمت کے لطف ونوازش سے سرفراز فرمائے۔آمین [مارچ۱۹۶۰ء]