مولانا سید عطاء اﷲ شاہ بخاری
ابھی مولوی عبدالحق کودنیا سے سدھارے پوراایک ہفتہ بھی نہیں ہواتھا کہ مولانا سیدعطاء اﷲ شاہ بخاری کے ملتان میں وفات پاجانے کی خبرملی۔اناﷲ واناالیہ راجعون۔شاہ جی نجیب الطرفین یعنی والد اوروالدہ دونوں کی طرف سے سید تھے۔حضرت شاہ عبدالقادر جیلانی،سید محمد شاہ بخاری اورسید عبدالغفار بخاری جو اکابر اولیاء وصوفیاء میں سے تھے اسی خاندان کے مورثان اعلیٰ میں سے ہیں۔ شاہ جی کے خاندان میں جو بزرگ سب سے پہلے ہندوستان آئے وہ سید اکمل الدین بخاری تھے جنھوں نے حضرت شاہ غلام علی دہلوی سے سند خلافت حاصل کرکے مہاراجہ رنجیت سنگھ کے عہد حکومت میں پنجاب کے ضلع گجرات میں مستقل بودوباش اختیارکرلی تھی۔ مرحوم کی والدہ سیدہ فاطمہ اوراُن کے دادا میر سید عبدالسبحان کشمیر سے منتقل ہوکر عظیم آبادپٹنہ میں آبسے تھے، ان کی بیٹی حضرت خواجہ باقی باﷲ کی نواسی تھیں۔ اس طرح خواجہ شاہ جی کے ننھیالی بزرگوں میں شامل ہیں۔شاہ جی کی والدہ کے انتقال کے بعداُن کے والد سید ضیاء الدین نے بیٹے کو نانا نانی کے پاس چھوڑا اورگجرات لوٹ آئے جہاں عقد ثانی کرلیا۔اس طرح شاہ جی کی ابتدائی تعلیم وتربیت پٹنہ میں ہوئی جودلی اورلکھنؤ کے بعد اردو زبان اورشعروشاعری کاتیسرا مرکز تھا اوراُسی کااثرتھا کہ شاہ جی نسلاً پنجابی ہونے کے باوجود اردوزبان ٹکسالی بولتے اور اُس کے محاورات وضرب الامثال پربڑی قدرت رکھتے تھے۔
مرحوم کسی مدرسہ کے باقاعدہ فارغ التحصیل نہیں تھے۔انھوں نے عربی فارسی کی ابتدائی کتابیں نانا سے پڑھیں۔نانی سے اردوبول چال کی زبان سیکھی۔ شادعظیم آبادی کے اس خاندان سے ذاتی مراسم تھے۔اس تقریب سے شاہ جی کو بھی شادعظیم آبادی کی صحبتوں میں بیٹھنے اوراُن سے فائدہ اٹھانے کا موقع ملا۔ ذہانت و فطانت خداداد تھی نتیجہ یہ ہواکہ کم عمری میں ہی پختہ ہوگئے،دماغ چمک اٹھا اور زبان منجھ گئی پھر پٹنہ سے نکل کرمختلف علماء سے وقتاً فوقتاً کبھی تفسیر، کبھی حدیث اورفقہ کادرس لیتے رہے لیکن وہ بھی بے ضابطہ اوربے قاعدہ۔
شاہ جی یوں توعلم وفضل اورسیرت واخلاق کی بہت سی خوبیوں اورکمالات کے جامع تھے جن کی وجہ سے لوگ اُن کی دل سے قدراور عزت کرتے تھے لیکن ان کاسب سے بڑاکمال جس میں کوئی اُن کا ہم عصر اُن کاشریک نہیں ہوسکتا تھا وہ ان کاکمال خطابت وتقریر تھا۔گھنٹوں یکساں روانی،جوش اورفصاحت وبلاغت کے ساتھ بولتے تھے اورکیا مجال کہ ایک شخص بھی اکتا کرمجلس سے اُٹھ جائے۔یہ معلوم ہوتا تھاکہ تقریر نہیں کررہے ہیں نشہ پلارہے ہیں، سامعین توسامعین فضا تک پر معلوم ہوتاہے سُکر کاعالم طاری ہوگیا ہے۔بڑ ے سے بڑا مخالف بھی اُن کی تقریر سنتا تھا اورجھومتا تھا۔اُن کے پاس اعجاز بیان اور سحر خطابت کاایسا کارگر حربہ تھا کہ اگر وہ چاہتے تواپنی شخصیت کی تعمیر کے لیے اس سے زیادہ سے زیادہ کام لے سکتے تھے لیکن اُن کی بے نفسی کایہ عالم تھا کہ تحریک خلافت، مجلس احرار، کانگریس اورجمعیۃ علماء، ہرمیدان میں صرف ایک سپاہی بنے رہے دوسروں کے تابع رہ کرکام کیا لیکن کبھی خودقائد نہیں بنے۔ لیکن ہمارے نزدیک دینی اعتبار سے شاہ جی کے لیے اس سے بڑا کوئی دوسرا شرف اورمقام نہیں ہوسکتاتھا کہ جب انھیں امیر شریعت منتخب کیا گیا توسب سے پہلے حضرت الاستاذ مولانا سید محمد انور شاہ صاحب کشمیری نے جواس زمانہ میں علم وفضل میں اﷲ کی حجت تھے، شاہ جی کے ہاتھ پر بڑی محبت اور عقیدت کے ساتھ بیعت کی۔یہ صرف دنیا کاہی سب سے بڑااعزاز نہ تھا بلکہ یہ بیعت انوری اس کی بھی ضمانت تھی کہ اﷲ کے ہاں ان کا حسن عمل اوردینی ولولہ وجوش مقبول ہوچکا ہے اورآج وہ دنیا میں نہیں ہیں تو امید قوی ہے فادخلی فی عبادی وادخلی جنتی کی دعوت قدس کے خلعت فاخرہ سے سرفراز وشاد کام ہورہے ہوں گے۔اللھم اغفرلہ وارحمہ رحمۃ واسعۃ۔ [ستمبر۱۹۶۱ء]