ڈاکٹر راجندر پرشاد
خدا کاشکر ہے جو سفر ۹؍ ستمبر ۶۲ء کوشروع ہواتھا وہ بخیر وخوبی ۲۳؍ مئی ۶۳ء کوپورا ہوگیا۔ اس مدت میں علم وادب اورملک وقوم کی بعض بڑی نامور اورمحبوب شخصیتیں ہم سے ہمیشہ کے لیے جدا ہوگئیں،ان میں سابق صدر جمہوریہ ڈاکٹر راجندر پرشاد،ڈاکٹر محی الدین زورؔ،خان بہادر مولوی محمدشفیع سابق پروفیسر عربی پنجاب یونیورسٹی لاہور، مولانا سعید انصاری اور جناب شفیق جونپوری خاص طور پر لائقِ ذکرہیں۔
گذشتہ چندماہ سے مکاتیب کناڈانے نظرات کے صفحات پرقبضہ کررکھا تھا اس لیے ان حضرات کی رسمِ تعزیت برہان میں حسب معمول ادانہ ہوسکی، جس کاافسوس ہے۔اوّل الذکر ملک کی تحریکِ آزادی کے بلند پایہ لیڈر، پہلے صدر جمہوریہ ہندہونے کے ساتھ ساتھ اخلاق واوصافِ ذاتی کے اعتبار سے بھی غیر معمولی شخصیت اورکردار کے انسان تھے۔ سادگی، مذہبیت، خلوص، رواداری اور مروت و وضعداری اُن کے خاص اوصافِ کمال تھے اوراِس حیثیت سے وہ صحیح معنی میں گاندھی جی کے نقشِ قدم پر چلنے والے تھے، علاوہ ازیں انگریزی زبان کے نامور مصنف اور اُردو ،فارسی کے فاضل بھی تھے۔ [جون ۱۹۶۳]