پروفیسر محمد عمرالدین
افسوس ہے پچھلے دنوں پروفیسر محمد عمر الدین کا ۶۲ برس کی عمر میں انتقال علی گڑھ میں ہوگیا،اوریہیں دفن ہوئے۔ مرحوم علی گڑھ یونیورسٹی میں ۲۴ء میں داخل ہوئے تھے، اُس وقت سے دمِ آخرتک اُن کا رشتہ اس درس گاہ سے منقطع نہیں ہوا۔ انھوں نے تعلیم یہیں مکمل کی، پھر یہیں لکچرر، ریڈر، پروفیسر اورصدر شعبۂ فلاسفی ونفسیات، وارڈن، اور پروووسٹ اورخداجانے کیاکیا ہوئے۔انھوں نے یونیورسٹی میں بڑے بڑے اتار چڑھاؤ اورانقلابات دیکھے تھے،اوراب آخر میں خود انقلاباتِ زمانہ کی عبرت انگیز تصویربن کررہ گئے تھے۔اسلامی فلسفہ اُن کا خاص مضمون تھا، امام غزالی ؒ کے فلسفۂ اخلاق پرانگریزی میں اُن کی ضخیم کتاب چند سال ہوئے یونیورسٹی کی طرف سے شائع ہوئی ہے۔بلاکے ذہین، بہترین منتظم،بے نفس وبے ریا، مجّسم خلوص، پیکرِ وضع داری، اور نہایت سادہ اوربے تکلّف! راقم الحروف سے دیرینہ اور بڑے مخلصانہ تعلقات تھے، یونیورسٹی سے ملازمت کے تعلق کے اعتبارسے مرحوم اس چمن کی پرانی بہار کی آخری نشانی تھے۔ ’’خدا بخشے بہت سی خوبیاں تھیں مرنے والے میں‘‘۔ [ستمبر ۱۹۶۴ء]