مولانا محمد مبارک علی
مولانا محمد مبارک علی صاحب جن کی عمرچھیاسی برس کے قریب ہوگی حضرت شیخ الہند کے شاگردِ خاص اورآپ سے بیعت بھی تھے اورحضرت کی اسارتِ مالٹا کے بعد حضرت الاستاذ مولانا مفتی عزیز الرحمن صاحب ؒ سے تجدیدِ بیعت کرلی تھی اور حضرت مفتی صاحب کے خدام خاص میں شامل ہوکر حضرت موصوف ہی سے طریقہ نقشبندی میں اجازت بیعت و ارشاد حاصل کی۔ایک عرصہ تک ٹونک میں صدر مفتی رہے اورریشمی خطوط کی تحریک سے بھی تعلق خاص رہا۔ غالباً ۱۹۱۹ء میں مدراس (پرناہٹ) تشریف لے گئے تھے اورپھر بریلی کے قدیم مدرسہ مصباح العلوم میں صدارت درس کی خدمت انجام دی۔اب کم وبیش اڑتیس سال سے دارالعلوم دیوبند میں نائب مہتم کے عہدہ پرفائز تھے۔اہتمام و انتظام میں دسترس کے علاوہ کبھی کبھی حدیث کی کسی کتاب کادرس بھی دیتے تھے۔ تقویٰ وطہارت اوراخلاق وشمائل کے لحاظ سے سلف صالحین کانمونہ اورمثال تھے۔ صدحیف!دنیا اب ایسے حضرات سے خالی ہوتی جارہی ہے۔تغمد ھمااﷲ بمغفرتہ ورحمتہ ۔ [ستمبر۱۹۶۸ء]