پروفیسر نجیب اشرف ندوی
افسوس ہے کہ پچھلے دنوں ممبئی میں پروفیسر نجیب اشرف ندوی کا اور کراچی میں مفتی انتظام اﷲ صاحب شہابی اکبرآبادی کاانتقال ہوگیا۔پروفیسر اشرف کا اُٹھان بڑاشاندار تھااُنھوں نے معارف میں جو مقالات لکھے تھے اور رقعات عالمگیری کی تحقیق وترتیب اوراُس پرمستقل ایک جلد میں مقدمہ لکھ کر انھوں نے جس قابلیت کا ثبوت دیاتھا اُس کی وجہ سے ان سے بڑی توقعات تھیں۔لیکن احمدآباد اور پھر ممبئی کی آب وہوانے ان کو بجھا سادیا تھا پھر بھی انجمن اسلام اردو ریسرچ انسٹی ٹیوٹ ممبئی کے ڈائرکٹر اورانجمن کے سہ ماہی رسالہ ’’نوائے ادب‘‘ کے ایڈیٹر کی حیثیت سے ان کی علمی وادبی سرگرمیاں کسی نہ کسی صورت میں جاری رہیں۔ چنانچہ اس زمانہ میں ہی انھوں نے ’’لغت گجری‘‘ ترتیب دی تھی ۔ بہرحال اُن کے دم سے اردو زبان سے متعلق تحقیق وریسرچ کا ممبئی میں چرچا تھااور اس بناپر اُن کی وفات علم وادب کی دنیا کاایک بڑاسانحہ ہے۔ [اکتوبر۱۹۶۸ء]