محمد نظام الدین
ابھی قلم یہیں تک پہنچا تھاکہ ڈاکٹر محمد نظام الدین کے انتقال کی خبر حیدآباد سے ملی۔ مرحوم عرصہ تک عثمانیہ یونیورسٹی حیدآباد میں فارسی کے پروفیسر اوردائرۃ المعارف کے ڈائرکٹر رہے اوراس حیثیت سے انھوں نے اسلامی علوم وفنون کی بڑی قابل قدر خدمات انجام دیں۔وہ پروفیسر براؤن کے خاص شاگرد تھے اور عربی وفارسی کے نامور اساتذہ اور فضلاء کی اس پرانی نسل سے تعلق رکھتے تھے جو اب آفتابِ لب بام ہے۔ستربرس کے لگ بھگ عمر ہوگی۔لیکن اس عالم میں بھی علمی کام کرتے رہتے تھے۔چنانچہ ابھی چندماہ ہوئے انھوں نے دوکتابیں سلوک الملوک فضل بن روز بن نبھان اورجوامع الحکایات از عوفی آڈٹ کرکے شائع کی تھیں۔علمی اورتحقیقی کمالات کے علاوہ بڑے مہذب شائستہ اورخدا ترس انسان تھے۔اﷲ تعالیٰ انہیں مغفرت و بخشش کی نعمتوں سے سرفراز فرمائے ۔آمین۔
[دسمبر ۱۹۶۸ء]