قاری حفظ الرحمن
قاری حفظ الرحمن صاحب کم وبیش تیس برس سے دارالعلوم دیوبند میں درسِ تجوید وقراء ت کی خدمت انجام دے رہے تھے اب ادھر ایک عرصہ سے اس شعبہ کے صدر تھے۔ انڈوپاک کے قراء میں ان کی شخصیت بڑی ممتاز اورنمایاں تھی۔ چنانچہ عام طور پرانہیں شیخ القراء کہاجاتا تھا اورواقعی وہ اس کے مستحق تھے۔ فن میں مہارت وبصیرت کے علاوہ قدرت نے آواز بھی ایسی پرسوز وگداز دی تھی کہ جہاں کہیں پڑھتے تھے معلوم ہوتاتھا کہ لحنِ داودی کے نغمے برس رہے ہیں اور فضا سرتاپا سماعت بن گئی ہے۔فالج میں کئی برس سے مبتلا تھے لیکن کام چل رہا تھا۔ آخروقت موعود بھی آپہنچا اور رباب ہستی بے نغمہ وصوت ہوگیا۔اﷲ تعالیٰ ان کی قبرٹھنڈی رکھے اورمغفرت وبخشش کی نعمتوں سے نوازے۔
[فروری ۱۹۶۹ء]