اسرار احمد آزاد
افسوس ہے پچھلے دنوں ہمارے ادارۂ ندوۃ المصنفین کے دو پرانے ساتھی داعیٔ اجل کولبیک کہہ کر اس دنیا سے رخصت ہوگئے۔جناب اسراراحمد آزاد اردو زبان کے ادیب اورنامور اخبار نویس تھے یوں انھوں نے غالباً کسی یونیورسٹی سے باقاعدہ کوئی سند نہیں لی تھی لیکن محض اپنی ذاتی محنت اور شوق سے اردو اورہندی کے علاوہ انگریزی میں اتنی استعداد بہم پہنچا لی تھی کہ اس زبان کے اخبارات و رسائل اورکتابیں بے تکلف پڑھ اورسمجھ لیتے تھے۔سیاسیات پران کا مطالعہ بہت وسیع تھا۔ ادارہ کے ابتدائی زمانہ میں مکتبۂ برہان کی طرف سے ان کی کتاب ’’بین الاقوامی سیاسی معلومات‘‘شایع ہوکر بڑی مقبول ہوئی تھی۔مرحوم نظر ثانی کرکے اس پر برابر اضافہ کرتے رہے چنانچہ اس کتاب کاآخری ایڈیشن جو شایع ہوا ہے وہ تین نہایت ضخیم جلدوں پرمشتمل ہے اور بے شبہ یہ کتاب اردوزبان کے پورے لٹریچر میں اپنی نوعیت کی ایک ہی ہے۔اس کے علاوہ مرحوم بہت جلد اور بہت اچھا لکھتے تھے۔ ان کی ساری زندگی جرنلزم کے نذر ہوگئی ورنہ اگر ان کو معاشی اطمینان حاصل ہوتا اورتصنیف وتالیف میں لگے رہتے تواردوزبان کے ذخیرہ میں بہت کچھ قابل قدراضافہ کرسکتے تھے۔اخلاقی اعتبار سے ان کی زندگی سراپا ایثار تھی۔خودمجرد رہے،محنت مزدوری کی اورایک بھائی کے بچوں کی تعلیم و تربیت پرہمیشہ اپنی توجہ مرکوز رکھی۔سری نگر میں روزنامہ ’’چنار‘‘ کے ایڈیٹر تھے، دھرادول میں انتقال ہوا۔اﷲ تعالیٰ مغفرت عطا فرمائے۔ [فروری۱۹۷۱ء]