قاری محمد یوسف
قاری محمد یوسف صاحب ندوۃ المصنفین کے یوم تاسیسں سے۱۹۵۱ء تک ادارہ سے برابر وابستہ رہے لیکن ان کاتعلق دفتر سے تھا اس سے بھی بڑھ کر ہم لوگوں سے ان کابڑا تعلق یہ تھا کہ وہ خود دیوبند کے فارغ التحصیل اورمولانا قاری محمد اسحاق صاحب میرٹھی جو حضرت مفتی عزیز الرحمن صاحب(والد ماجدمولانا عتیق الرحمن عثمانی) کے خلیفۂ مجاز اورایک بلند پایہ صوفی اورعارف باﷲ تھے، ان کے صاحبزادے تھے۔ ۱۹۳۷ء سے پاکستان جانے تک قاری اورمترجم کی حیثیت سے آل انڈیا ریڈیو سے برابر وابستہ رہے اوربہت مقبول تھے۔ترک وطن کے بعد حیدرآباد سندھ میں ناظم تعلیمات اسلامی کی حیثیت سے برسوں کام کیا۔ دوتین سال سے بعض خانگی حوادث کے باعث خانہ نشین ہوگئے تھے۔انتقال کے وقت۷۲۔۷۳ برس کی عمرہوگی۔اللھم اغفرلہ وارحمہ ۔
[فروری۱۹۷۱ء]