پروفیسر محمد حبیب
افسوس ہے گذشتہ ماہ جون کی ۲۲تاریخ کوپروفیسر محمد حبیب نے۷۳برس کی عمر میں علی گڑھ میں وفات پائی اوروہیں دفن ہوئے۔موصوف ہماری نسل کے اُن معدودے چند اکابرعلم وادب میں سے تھے جن کے زورقلم،وسعت مطالعہ اور مجتہدانہ فکرونظر نے یورپ اورامریکہ کے علماء اورفضلاء کوبھی متاثر کیا تھا۔وہ جتنے بڑے اسکالر تھے بحیثیت انسان کے بھی اتنے ہی عظیم شخصیت کے مالک تھے۔ طلباء کی تعلیمی،علمی،مالی غرض کہ ہرقسم کی اورہروقت خدمت ان کا دین وایمان تھا۔طبیعت بالکل درویشانہ پائی تھی۔نام ونمود اوردکھاوے کانام ونشان نہ تھا۔ نہایت خلیق،ملنسار،متواضع انسان تھے۔ان کے بعض افکاروآراء سے کسی کو کتنا ہی اختلاف ہواورہمیں بھی تھا لیکن ان کی شرافت، انسانیت دوستی اورجذبۂ خدمت خلق ہرشک وشبہ سے بلندتھا۔اﷲ تعالیٰ اپنے فضل عمیم سے ان کی مغفرت فرمائے۔ آمین۔
[اگست۱۹۷۱ء]