محمد یٰسین نوری بیرسٹر
جناب محمد یٰسین صاحب نوری بیرسٹر بھی ہماری قومی اور ملی زندگی کے بڑے ممتاز ہیرو تھے ۔گجرات ان کا وطن تھا۔ علی گڑھ میں تعلیم پائی اس لیے اس کے اولڈ بوائز ایسوسی ایشن کے بڑے فعال اورمخلص رکن تھے۔ولایت جاکر بیرسٹری کی اور بمبئی میں رہائش اختیار کی۔خلافت تحریک سے لے کر کانگریس کی جنگ آزادی تک ہر تحریک میں بڑھ چڑھ کر حصہ لیا۔قیدوبندکی صعوبتیں برداشت کیں۔مگراپنی کسی خدمت کا صلہ طلب نہیں کیا۔آزادی کے بعد ملک میں مسلمانوں کی حالت زارنے ان کی تمام توجہات اورمساعی کواس حالت کے سدھارنے پر مرکوز کردیاتھا۔اس سلسلہ میں انھوں نے جس بے باکی اور جرأت سے کام کیاوہ اُن کے غایت خلوص اور بے غرض خدمت قوم کی بڑی عمدہ مثال ہے۔ علی گڈھ مسلم یونیورسٹی بل کے سلسلہ میں انھوں نے اولڈ بوائز کونسل کے ایک وفد کے قائد کی حیثیت سے ابھی حال میں ہی وزیراعظم سے جو ملاقات کی تھی تواس میں علی گڑھ کامعاملہ اس خوبی سے پیش کیاکہ وزیراعظم قائل ہوگئیں۔ اﷲ تعالیٰ ان کو آخرت کی فلاح وبہود اور کامرانی وکامیابی سے نوازے اور ان کی قبر ٹھنڈی رہے۔آمین [اگست ۱۹۷۱ء]