مولانا عبدالحفیظ بلیاوی
ابھی چند روز ہوئے (۲۶ ؍جولائی کو) مولانا عبدالحفیظ صاحب بلیاوی بھی ہم کوداغِ مفارقت دے گئے۔انا ﷲ وانا الیہ راجعون۔ مرحوم دارالعلوم دیوبند کے قدیم فارغ التحصیل تھے اوراب ادھر ایک عرصہ سے ندوۃ العلماء لکھنؤ میں عربی زبان وادب اوردوسرے علوم وفنون دینیہ کے نامور استاد تھے۔استعداد بڑی پختہ تھی اورمطالعہ وسیع تھا۔عربی زبان وادب کاذوق فطری تھا جس کی شاہد عدل ان کی مشہور متداول کتاب ’’مصباح اللغات ‘‘مطبوعہ مکتبہ برہان ہے اور جس پران کو وزارت تعلیم اور یوپی گورنمنٹ کی طرف سے انعامات بھی ملے تھے۔ طبعاً بڑے متواضع، خوددار اور خلیق و ملنسار تھے۔ ابھی گزشتہ مئی کی ۱۷؍ تاریخ کوان کی قیام گاہ پران سے ملاقات ہوئی تھی ۔چند ماہ سے بیمار تھے لیکن اس وقت اس کا خیال بھی نہیں تھاکہ یوم موعود اتنا قریب ہے۔ اﷲ تعالیٰ ابرار وصلحا ء کامقام جلیل عطا فرمائے ۔آمین [اگست ۱۹۷۱ء]