مولانا احتشام الحسن کاندہلوی
افسوس ہے ہمارے عزیز اور فاضل دوست مولانااحتشام الحسن کاندہلوی بھی گزشتہ نومبر میں شدید علالت کے بعد انتقال کرگئے۔مولانا کاندہلہ کے رئیسوں میں شمار ہوتے تھے لیکن ان کا مشغلہ تبلیغی کتابوں کی تصنیف وتالیف اور مطالعہ کے سوا کچھ نہ تھا۔شب وروز اسی میں بسر ہوتے تھے اور گفتگو کاموضوع بھی بس یہی ایک بات ہوتی تھی۔تبلیغی جماعت کے طریق کارسے ان کو اختلاف تھا۔وہ کہا کرتے تھے کہ تبلیغ تو نام ہی اسلام کوغیر مسلموں تک پہنچانے کا ہے۔ مرض الوفات میں مبتلاہونے سے ایک ماہ قبل علی گڑھ آئے اور ایک ہفتہ کے قریب قیام کیا۔ان دنوں میں ان سے کئی مرتبہ ملاقات ہوئی اورہرملاقات میں وہ اپنے اس محبوب موضوع پرتقریر کرتے رہے ہیں۔میں حسب عادت خاموش سنتا رہا اور بولا کچھ نہیں۔مرض الوفات میں انھوں نے بڑی سخت تکلیف اٹھائی لیکن صبر ورضا کادامن ہاتھ سے نہیں چھوڑا۔ بڑے خلیق اورعابد وزاہد بزرگ تھے۔اﷲ تعالیٰ ابرار وصلحا کامقام عطا فرمائے آمین۔ [جنوری ۱۹۷۲ء]