مُلاّ جان محمد
افسوس ہے گذشتہ مہینہ ہمارے دومخلص قومی کارکن ملاجان محمدکلکتہ اورمولانا محمد عاقل الٰہ آباد انتقال کرگئے۔ملا صاحب کااصل وطن پشاور تھالیکن عرصہ دراز سے کلکتہ میں آبسے تھے اوراب سچ مچ وہی ان کاوطن تھا۔نہایت پُرجوش،جری اوربیباک انسان تھے۔گذشتہ نصف صدی میں کوئی قومی اور ملی تحریک ایسی نہیں ہے جس میں انہوں نے بڑھ چڑھ کراورولولہ و عزم کے ساتھ حصہ نہ لیا ہو۔ ان کی علمی زندگی کاآغاز تحریک خلافت سے ہوا اوراختتام مجلس مشاورت پر۔کلکتہ میں شاید ہی کوئی مسلم ادارہ(یہاں تک کہ محمڈن اسپورٹنگ کلب بھی) ایسا ہوجس میں ملاصاحب نے نمایاں حصہ نہ لیاہو۔اسی وجہ سے وہ کلکتہ کے لوگوں میں بے حد مقبول تھے۔ بڑے بے غرض،بے لوث اورنہایت سادہ اورمخلص مسلمان تھے۔۱۹۵۰ء میں کلکتہ کے فساد میں لوگوں نے ان کو بچوں کی طرح چیختے اور روتے دیکھا ہے۔ عمر۸۵ سال کے قریب تھی۔ [نومبر ۱۹۷۲]