سید عبدالرحمن تھنگل
افسوس ہے گزشتہ مہینہ مسلمانوں کی بعض نمایاں شخصیتیں ہم سے جدا ہوگئیں۔ سید عبدالرحمن تھنگل آل انڈیا مسلم لیگ کے صدر تھے۔سابق صدر مسلم لیگ محمد اسماعیل صاحب مرحوم نے اس جماعت کاجووقار اورمرتبہ جنوبی ہند میں قائم کردیا تھا، سید عبدالرحمن تھنگل نے نہ صرف اسے قائم رکھا بلکہ بعض حیثیتوں سے اس میں اضافہ کیا۔ وہ نہایت سوجھ بوجھ اورفہم وتدبر کے سیاست دان تھے۔ حکومت اوردوسری سیاسی پارٹیاں بھی ان کی لیاقت و قابلیت اور بلندکردار کی معترف تھیں۔ ان کی دینداری کاثبوت اس سے بڑھ کراورکیاہوسکتا ہے کہ ان کی وفات حج سے فراغت کے بعد ہوئی اوران کا جسدِخاکی سرزمین قدس کی امانت بن گیا، یہ وہ موت ہے جس پر زندگی کوبھی رشک آتاہے۔ اﷲ تعالیٰ ان کے مدارج ومراتب بلند فرمائے۔ [فروری۱۹۷۳ء]