عبدالقیوم انصاری
عبدالقیوم صاحب انصاری بہار کے مشہور نیشنلسٹ اورقومی کارکن تھے۔ انھوں نے قید وبند کے مصائب بھی برداشت کیے اورتحریک پاکستان کے زمانہ میں اپنوں کے ہدف ملامت بھی بنے، لیکن ان کے پائے استقلال میں کوئی لغزش نہیں آئی۔وہ بہار گورنمنٹ میں وزیر تھے لیکن ان کاطورطریق بالکل عوامی تھا۔ ان کی زندگی ارباب حاجت کی مدد کے لیے وقف تھی۔چنانچہ ان کی وفات بھی خدمت کرتے ہی واقع ہوئی۔ سیاسیات میں غایت درجہ انہماک کے باوجود نماز، روزہ کے پابند اوربڑے خلیق اور متواضع تھے۔ [فروری۱۹۷۳ء]