مولانا مفتی عمیم الاحسان صاحب مجددی برکتی
ڈھاکے ایک خط سے ابھی چند روز ہوئے یہ معلوم کرکے بے حد افسوس ہواکہ مولانا مفتی سید عمیم الاحسان صاحب مجددی برکتی داعی اجل کولبیک کہہ کراس خاکدان عالم سے رخصت ہوگئے۔ مولانا اپنے زمانے کے بلندپایہ اور وسیع النظر ومحقق عالم تھے۔ فقہ وحدیث آپ کے خاص فن تھے جن میں بڑی گہری نظر رکھتے تھے۔درس کے علاوہ افتا اورتصنیف وتالیف کابھی مشغلہ تھااور اسی سلسلے میں متعدد اہم کتابیں آپ کے قلم کی مرہون رقم ہیں۔ علاوہ ازیں نہایت متقی، متورع اورصاحب باطن بھی تھے۔زندگی کاایک بڑاحصہ کلکتہ میں بسر ہوا۔تقسیم کے بعد ڈھاکہ چلے گئے اوروہاں کے مدرسۂ عالیہ میں پروفیسر حدیث وفقہ ہوگئے تھے۔ ڈھاکہ میں عید کی نماز مولانا نے ہی پڑھائی تھی۔اس کے بعد طبیعت خراب ہوگئی جس کاسلسلہ دس روز تک چلتارہا یہاں تک کہ ۲۷/اکتوبر کوساڑھے چاربجے صبح طائر روح قفس عنصری سے پرواز کرگیا۔ ناظم ندوۃ المصنفین اورایڈیٹر برہان سے بڑی محبت کرتے اورخلوص رکھتے تھے اس لیے ہم لوگوں کے لیے یہ ذاتی حادثہ بھی ہے۔اﷲ تعالیٰ انھیں کروٹ کروٹ جنت عطاکرے اوران کے مدراج ومراتب بڑھائے۔آمین ثم آمین [نومبر۱۹۷۴ء]