مولانا عامر عثمانی
افسوس ہے پچھلے دنوں مولانا عامر عثمانی ایڈیٹر تجلی دیوبند کابھی غریب الوطنی میں قلب کادورہ پڑنے سے اچانک انتقال ہوگیا، مولانا مفتی عتیق الرحمن صاحب عثمانی کے برادرعم زاد تھے، دارالعلوم دیوبند سے فراغت پائی تھی، ذہانت و طباعی اورشعرو ادب کا ذوق اس خاندان کی خصوصیت ہے۔ مرحوم کوبھی اس سے بہرۂ وافر ملا تھا۔چنانچہ اردو زبان کے نغزگوشاعر بھی تھے اورایک صاحب طرزادیب بھی،شگفتہ نگاری کے ساتھ قلم بے حد شوخ اوربے باک تھا۔تنقید میں لگی لپٹی کچھ اٹھا کے نہیں رکھتے تھے اوراس اعتبار سے اس شعر کامصداق تھے:
ناوک نے تیرے صید نہ چھوڑا زمانہ میں
تڑپے ہے مرغ قبلہ نما آشیانہ میں
لیکن تنقید بڑی محنت اورکثیر مطالعہ کے بعدکرتے تھے، مذہبیات میں طنز نگاری ان کی ایجاد تھی۔ اﷲ تعالیٰ کمزوریوں سے عفوودرگزر فرما کرمغفرت وبخشش کی نعمتوں سے سرفراز فرمائے۔آمین [مئی۱۹۷۵ء]