مولانا محمد اسمٰعیل سنبھلی
افسوس ہے کہ مولانا محمد اسمٰعیل سنبھلی بھی ہم سے رخصت ہوگئے۔ مولانا دیوبند کے فارغ التحصیل تھے اوربڑے جوش اورجذبہ کے انسان تھے اسی وجہ سے وہ ہمیشہ جمعیۃ علماء کے ساتھ وابستہ رہے اوراس سلسلہ میں قید ومحن کی تکالیف بھی برداشت کیں۔وہ نہایت پُرجوش خطیب ومقرر تھے، ان کی تقریر کی خصوصیت یہ تھی کہ شروع سے لے کر آخیر تک ایک سکینڈ کے وقفہ کے بغیر اورایک ہی لب و لہجہ سے تقریر کرتے تھے۔ تقسیم کے بعد دوسرے حضرات کی طرح انھوں نے بھی عملی سیاسیات سے ترک تعلق کرلیا تھا اوریوپی اورگجرات کے مختلف مدارس میں درس و تدریس کاکام کرتے رہے۔ نہایت مخلص،بے لوث اورمتواضع بزرگ تھے۔اﷲ تعالیٰ ان کو مغفرت و رحمت کی نوازشوں سے سرفراز فرمائے۔
[دسمبر۱۹۷۵ء]