بسمل سعیدی
افسوس ہے پچھلے دنوں جناب بسمل سعیدی کاچند ماہ کی مسلسل علالت کے بعد دہلی میں انتقال ہوگیا۔مرحوم ٹونک(راجستھان)کے خاندان سادات سے تعلق رکھتے تھے، اس خاندان کی قرابت حضرت سید احمد شہید سے بھی تھی۔اس خاندان میں تعلیم قدیم وتعلیم جدید دونوں کے نامور افرادواشخاص پیداہوئے۔ مرحوم بلند پایہ شاعر اورصاحب فن استاد سخن تھے، غزل اورنظم دونوں پریکساں قدرت تھی، اُن کے فیض صحبت سے سینکڑوں نوجوان بڑے شاعر ہوگئے۔ایک عرصہ سے دہلی میں مقیم تھے۔خاندانی اعتبار سے صاحب املاک وجائیداد تھے لیکن ایک ایسی افتاد پڑی کہ سب کچھ جاتارہا۔طبعاً نہایت غیور وخوددار تھے۔ زندگی کے آخری سال عسرت اورتنگدستی میں گزرے یہاں تک کہ جسم وجان کا رشتہ بھی اسی عالم میں منقطع ہوگیا۔اﷲ تعالیٰ مغفرت وبخشش کی نعمتوں سے نوازے۔آمین
[ستمبر۱۹۷۷ء]