سید محبوب رضوی
بڑے افسوس اوردکھ کی بات ہے کہ ہمارے عزیز دوست جناب سید محبوب رضوی صاحب اچانک۲۵/مارچ کو راہی ملک بقاہوگئے۔مرحوم نے اچھے خاصے ظہر کی نماز چھتے کی مسجد میں ادا کی، فراغت کے بعد سینے میں کچھ درد محسوس ہوا تو فوراً ایک رکشا کرکے گھر روانہ ہوئے لیکن ابھی گھر پہنچے بھی نہ تھے کہ مرغ روح قفس عنصری سے پرواز کرگیا۔اناﷲ واناالیہ راجعون۔
مرحوم دارالعلوم دیوبند سے فراغت کے بعد ہمہ تن دارالعلوم کی خدمت کے لیے وقف ہوگئے۔انھوں نے مختلف دفتری خدمات بڑی دیانت داری، محنت اور قابلیت سے انجام دیں۔ اُن کو مطالعہ تحقیق اورتصنیف وتالیف کااعلیٰ ذوق قدرت کی طرف سے عطاہوا تھا، وہ دیوبند کے مایۂ نازادیب محقق مؤرخ اور مصنف تھے۔ اُن کاآخری شاندار کارنامہ ’تاریخ دارالعلوم دیوبند‘ کی دو جلدیں ہیں۔ عادات وفضائل کے اعتبار سے نہایت دین دار، عابد وزاہد، معاملہ فہم، خوش اخلاق اور دیانت دار تھے۔ اس میں شبہ نہیں کہ اُن کی وفات دارالعلوم کاایک عظیم نقصان ہے۔اللھم اغفرلہ وارحمہ۔ [اپریل۱۹۷۹ء]