پروفیسر اصغر علی فیضی
پروفیسر فیضی آکسفورڈ کے اعلیٰ تعلیم یافتہ تھے ان کااصل مضمون قانون تھا، مشرقی علوم وفنون میں بھی ان کودسترس تھی۔اسلامی قانون پران کی کتابیں حوالہ کی کتاب (Book of Reference)کی حیثیت رکھتی ہیں۔ عرصہ تک لاء کالج بمبئی کے پرنسپل رہے، انڈیا کے مصراور شام میں بھی سفیر رہے اورکشمیر یونیورسٹی کے وائس چانسلر بھی ہوئے۔ وزیٹنگ پروفیسر کی حیثیت سے کینیڈا، یورپ اورامریکہ کی متعدد یونیورسٹیوں میں لکچر دیے۔برہان کے خریدار شروع سے تھے اوراس کی بڑی قدر کرتے تھے، برہان کا کوئی مقالہ یانظرات ان کوزیادہ پسند آتاتھا تواس کی داد تحریراً دیتے تھے۔عرصہ سے ان کاکوئی خط نہیں آیاتھا۔بعض خانگی معاملات اورمسلسل ضعف وعلالت کے باعث سخت پریشان تھے۔ اب اچانک اخبارات میں ان کے انتقال کی خبر نظر سے گزری تودیرینہ تعلق کے باعث سخت صدمہ اورافسوس ہوا۔ اللھم اغفرلھما وارحمھما۔ [نومبر۱۹۸۱ء]