مولانا محمد رفیع
افسوس ہے پچھلے دنوں ہمارے نہایت فاضل دوست لیفٹنٹ کرنل خواجہ عبدالرشید کالاہور میں، اورمولانا محمد رفیع صاحب کا انتقال دیوبند میں ہوگیا۔ اوّل الذکر پرتوایک مضمون برہان کی آئندہ اشاعت میں شائع ہوگا۔مولانا محمد رفیع صاحب حضرت شیخ الہندؒ کے نواسے تھے۔ دارالعلوم دیوبند کے فاضل اور پختہ استعداد کے عالم تھے، ان کے والد ماجد مولانا محمد شفیع صاحب جو علم و عمل، تقوی وطہارت اورفقر ودرویشی میں سلف صالحین کے نمونہ تھے۔عرصۂ دراز تک مدرسہ عبدالرب دہلی کے صدر مدرس رہے، مولانا محمد رفیع بھی عمر بھر اس مدرسہ میں استاد رہے۔والد ماجد کی وفات کے بعد مدرسہ کے ناظم بھی ہوگئے تھے۔ عملاً نہایت صالح،عابد وپرہیزگار،خوش پوشاک اورخوش اخلاق تھے، عمر۸۷برس کی ہوئی۔اللھم اغفرلہ وارحمہ۔ [اپریل۱۹۸۳ء]